Guruji Sundar

1. உனக்கு (இருதயத்திற்க்கு) எப்போதும் உண்மையாக இரு!
2. உனது மனதின் சகல குணாதிசயங்களையும் ஆராய்ந்து அறிவாயாக!
3. நீ உனது மனதின் அனைத்து குப்பைகளையும் அகற்றினால் தான் உன் உண்மை நிலை வெளிப்படும்.
4. உன் சுய சொரூபத்தை மாயை என்னும் அறியாமை மறைத்திருப்பதால் உன்னை நீ சாதாரண மனிதனாக நினைத்து கொண்டு இருக்கின்றாய்.
5. நம்முடைய எல்லா பாவங்களையும் நம் தவாக்னியால் எரித்து சாம்பலாக்கி விடலாம்.
6. கர்மக்கள் தீவிர தவ சாதனை செய்பவரை தீண்டாது!!
7. தவ சாதனையே நமக்கு ஞானத்தின் நுழைவாயிலாகும் !!
8. உனது மனதில் எழும் அத்தனை எண்ணங்களும் உனக்கு சொந்தமானவை அல்ல !! பின் ஏன் நாம் நமது அனைத்து எண்ணங்களுடனும் போராட வேண்டும்.
9. குருநாதரின் ஆத்ம விழிப்புணர்வு சபை உங்களுக்காகவே திறக்கப்பட்டதாகும்.
10. அதனை வளர வைக்க வேண்டியது உங்களின் அனைவரின் பொறுப்பாகும். சபை உங்களுக்கு என்ன செய்தது என்று கேட்பதை போல நீங்கள் சபை வளர என்ன செய்தீர்கள் என்று உங்களை கேட்டு கொள்ளுங்கள்.
11. ஆத்ம விழிப்புணர்வு சபை உங்களின் தீராத பிறவி நோய்க்கு அரு மருந்தாகும். சபையை வளர்ப்போம் மேம்படுவோமாக !!

1.   நினைத்த நேரத்தில்,

நினைத்த இடத்தில்

நிலைக்க கூடிய மாருதியே

எனக்காக பல முறை

இறங்கி வந்திருக்கின்றாய்?

எனக்கு அத்தனை தகுதி

இருக்கின்றதா, இது பலமுறை

என்னுள் எழும் கேள்வி!

2. உன்னை வணங்கும் போது

என் நெஞ்சு புடைக்கின்றது ..

எத்தனை கழ்டங்கள் இருந்தாலும்

அது தவிடு பொடியாகின்றது

இது என் அனுபவம்!

3. மாருதியே நீ எனக்காக

இறங்கி வரும் போது

எப்போதுமே வாணர

வீரனை போல குதித்து

தான் வருகின்றாய்!

உன் வேகம் என்னை

வியக்க வைக்கின்றது !!

என் தலைவி  காமாட்சியே

நான் உன்னிடம் வருவதே

என்னை முழுமையாக

இழப்பதற்க்கு தான் !!!

தாயே நான் வெற்று

காகிதம் ஆகிவிட்டேன்

நீ வந்து என்னை ஆட்சி

செய்! நான் கரைந்ததே

நீ வருவதற்கு தான் !!!

வேறு எதற்கு தாயே!!!

எங்கும் வியாபித்து இருக்கும் இறையை முழுமையாக மறைத்த இறைவா!!

ஞானிகளுக்கும், ரிஷிகளுக்கும், மகான்களுக்கும் மட்டும் ஏன் இறையை உணர்த்துகின்றாய்!!

ஏன் இந்த பாரபட்சம், மக்கள் எல்லோரையும் இறை நிலையை, மாயையை விளக்கி உணர்த்த வேண்டியது தானே!!

அப்போது இப்பூவுலகம் இன்னும் அழகாக இருக்குமே !!

1. கற்ற கலைகள் பல ஆயினும் எவையும் நம்மை காக்காது. கலைகளுக்கெல்லாம் கர்த்தாவாகிய காஞ்சி காமாட்சியின் திருப்பாதம் சரண் அடைவதே உய்வதற்க்கு ஒரே வழியாகும்.
2. எத்தனை முறை சென்று தரிசித்தாலும், திகட்டாத தெவிட்டாத தேனமுது அவள்.
3. இன்னும் ஈராயிரம் பிறவிகள் எடுப்பதற்க்கும் நான் விழைகின்றேன்! உன் காலடியில், எப்போதும் நான் இருப்பதானால்
4. தாயே உன் காலடியில் தான் மூவுலகங்களும் ஒரே நேரத்தில் வெவ்வேறு அலைவரிசையில் இயங்குகின்றன. இதனை உன் திருவருளால் நான் உணர்ந்தேன். மூவுலகத்திலும் உன்னை போற்றி கொண்டு தான் இருக்கின்றார்கள் என்பதையும் நான் உன்னால் உணர்ந்தேன்.
5. மகான்கள், ஞானிகள், ரிஷிகள் எதனை இறையாக தன்னிடத்தில் உணர்கின்றனரோ, அது உன்னை சுற்றி எங்கும் வியாபித்துள்ளது. அதனால் தான் நானும், கள் குடித்த மாந்தரை போன்று உன்னை சுற்றி கொண்டிருக்கிறேன், தாயே!
6. உனக்கும் எனக்கும் எவ்விடத்தில் சம்பந்தம் உண்டாயிற்று? நான் பிச்சைக்காரனாய் உன் சன்னிதானத்தில் நின்ற போதா? அல்லது அதற்கும் முன் நிர்வானியாய் காசியில் கங்கை கரையில் மௌனத்தில் ஆழ்ந்திருந்த போதா..? சொல் என்னவளே காமாட்சியே !!
7. ஆதியும் அந்தமும் அற்ற, பகலும் இரவும் அற்ற, பிறப்பும் இறப்பும் அற்ற சுத்த சூன்‌ய வெளியில் சுழன்று கொண்டிருக்கும் என் காமாட்சியே! உன் குழந்தைகளாகிய எங்களையும் அவ்விடத்திற்க்கு அழைத்து செல்க!!
8. காதல் என்ற பாற்கவர்ச்சியில் மூழ்கும் வீணர்களே!! ஒரு முறை நீங்கள் என் காமாட்சியின் கண்களை காணுங்கள். தேன் குடித்து மயங்கி கிடக்கும் வண்டை போல அவள் காலடியில் வீழ்ந்து கிடப்பீர்கள் !! என்னைப் போல!!